今日係2018年最後既一日，我就黎個2018年投資，工作等等回顧:
工作方面，2018年我開始唔番工，主力去做物業投資，當然少左工作就無左一份基本既工資保障，但我得到既係每日既時間可以好自由去控制。我可以隨時北上搵盤，過戶等等。不過係無番工呢一年裡面，我發覺自己退化得好快，好多新野都唔多識，原來番工除左俾到份工資你之外重可以俾到一種迫你去update 自己既機會，你問我會唔會再番工?? 可能架，我都有諗過，其實我好鐘意睇戲，我都有諗過去戲院到做，日日睇下戲，都好似幾爽咁。另外揸的士都有諗過，其實我都幾鐘意揸車，不過自己唔熟路脾氣唔好，所以都重未試過，可能今年農曆新年試試先，所以大家如果見到我揸的士，到時就打個招呼呀。
投資方面，自己呢兩年都行出左一個新方向，玩法已經完全不同了。呢一年，手上持有物業達到四十多個，當然可能有人一個成億既物業就KO左我，但我自己所奉行既投資方法並非常人所能明白。我自己對我自己既評價係一個收買佬，一個物業既收買佬，我在我既心儀區域將一D無人要既垃圾購入，然後將垃圾變身為廢物，從而係垃圾變廢物既過程中賺取資產升值，當然廢物升值都需要時間，你問我要幾耐，我答你唔到，但我見到係會升值。另外好多人一見我買既物業，就即刻走頭，睇都唔睇。曾經有家人問我，點解你買D樓咁架，又爛又殘又漏水? 但當我將物業大變身後俾佢地睇後，就即刻收晒聲，外表其實可以用錢去包裝，唯獨內在價值永遠唔係凡人能夠一眼看穿。
唐山大亨，分開了就係分開了，既然大家各有思維，難分對錯，分開未嘗不是一件好事。我自己份人一向不愛拘束，不受正規所束縛，其實我脾氣古怪亦偏激，可能呢種性格先可以做就我係物業投資路上獨當一面吧，都幾十歲，無理由你要我改性格吧? 我改唔到了。
葳言大意，今年係自己好幸運地獲葳葳邀請上到葳言大意，重要3次咁多，大家都知上得葳言大意既家賓都係該方面既投資高手，所以可以上到去分享確係好難得，但自己在眾多高手中應該都算平民級別。不過自己同自己講，葳葳請過羅傑斯，湯博士，汪生等等名人，我都叫做摱車邊上到去，起碼都被人與以肯定吧，做人阿Q少少會開心D🤣🤣。
投資課程，除左自己投資，平日時間就可以抽空出黎教物業投資，我唔知道呢兩年上過我堂既學生覺得點? 但我自己基本上係毫無保留咁講了，當然我份人一向口不擇言，唔識兜圈，得罪人多稱呼人少，所以大家聽到唔o岩聽就當聽唔到算吧。其實教左咁耐野後，我發現香港好多人鐘意免費午餐，但其實係好唔健康，其實人地賺唔到錢去教你野，你覺得世上有咁好既人? 除左朋友親戚外我真係未見過，咁點解大家要追求呢? 其實最終你好大機會係俾人賺左你一舊更大既錢，同埋你會係得到損失而唔係學習同搵到機會，所以返回現實，你唔好祈望我會免費去教大家，我無咁偉大亦都唔會，我收錢零願做善事都唔會免費，記住，所以新既一年再唔好問我有無得免費或試我底線等等，基本野我可以答下你，但深入野你問我，我唔答你，你就寸我收收埋埋果D，我想同你講我應份架? 我答左你咁對我同我D學生又公平咩?
我唔介意你唔報我堂，但我介意你侮辱左我既價值。上堂或分享會亦發現有人態度欠佳，對工作人員D態度西到爆，老實講連我自己咁大脾氣都對工作人員恭恭敬敬，你憑乜野要對佢地呼呼喝喝，就算你有錢報堂，我都唔會收你同教你，如果咁少既錢買得起我，我諗我呢世人都唔洗見人，所以呢類人士可以慳番，我亦唔希望再見到該類人士。
上過我堂既學生都知，我一向無稿在手，永遠唔跟powerpoint 鐘意講乜就講乜，但做人有時太隨心未必係好事，因為就係唔識粉飾外表。坊間其它阿Sir好多教買入物業可以賺幾錢幾多回報等等，計到條數好靚，然後介紹你去買，然後自己個佣金就袋袋平安，一個人頭收十萬八萬佣金，我都覺吸引，但我自己真係做唔出。
我既學生好慘好多時問我買唔買好，我經常會嚇佢地，你諗清諗楚先好買。我自己會教學生會係先計好呢層樓係最壞程況下最多會令你輸幾多，輸果時你重可唔可以正常生活，如果你覺得ok 你就去買喇，如果你有一絲唔開心瞓唔著，你就考慮清楚，不過老實說唔太多人做到，知易行難。物業投資難在不似股票，買賣都快，賣左贏輸都無手尾，但物業唔同，你要花精神諗方法先至可以得到理想既回報。如果股票要學的話，物業投資更加要學。
物業投資並不是1+1等於2，可以以變成100 亦可以係變零或者負數，在乎於你既方法，方法無分對錯，只有風險。 係電影無雙內有一句話 「只睇到黑同白的人永遠是失敗者」 呢句話係物業投資上絕對用得上，大家可以領會一下。
業Sir金句: 「我咩都唔怕，我最怕窮。」 我好貪錢? 係架，當你試下無錢時，所有人對你既感覺就知點解我咁貪錢，因為無錢你跟本保護唔到身邊人，唔通你憑感情去保護佢?咪講笑喇，錢係工具，只在乎於你點去使用。
講咁多，就當係2018年既一個總結吧，有得既也有失，人越大朋友越少，來年大家有時間就搵朋友多聚聚吧。我經常同我班中學同學講，再唔聚真係要紅白二事先有得聚，紅事就過得8899，咁跟住會係咩事呢?
另外多謝2018年跟我交流及合作過既朋友，希望大家來年繼續拍住上
葳葳 Sake Diamond 酒匯 TaiKoo West Bpa Asia Pbchk Wealth Hub 富匯商業顧問 豐盛有機農莊Fruitful Organic Farm 翡鑽 The Jade Jewellery 綠悠遊 亂博 期人 阿棍屋
祝大家新年快樂，身體健康
Comments