這幾天狗狗身體唔好，好多野都無乜理了，就只講番自己既故事。
上回講到沙士，當年好似大約一年左右，沙士過左，好多公司結業，百廢待興咁。還算好彩小弟打緊工果間就無乜事，因為小弟人工相對低微，多我一個唔多少我一個唔少。小弟果時唔識乜野係投資物業，就聽到公司同事又開始炒股票，我果時又確係好叻仔，唔知點解又儲到2x - 30萬左右。當其時公司個個買果隻股票，我深信全香港都好多人賴過野，果隻就係8號仔。當其時8號仔係我地個客，重聽到D員工話今年花紅揀錢定股票等等，而家心諗聽番揀左股票都幾慘。
我地公司係IT公司，當然對呢類咁高智能既公司會予以支持，作為員工既我地，當然個個都踴躍捐輸，我記得自己由10元8塊起不斷買落去，自己一向賭性重，唔會分太多注，我記得3注左右就彈盡糧盡。我記得均價係5.xx。當其時重未到最傷一刻，最傷果刻，黎了，同六神合體一樣，叫聲基恩，就跳落個山涯。出到5合1，五股合埋一股，暈了!!!!全公司即刻收晒皮，繼續努力番工，我又點? 無眼睇，有無聽過由零開始，果刻正正係，輸晒咪又黎搵過law。當其時全公司我估加埋無一千都有幾佰萬掉左落去，後來先知，我都確係幾博，因為以我咁既人工我買落去都算頭幾位。
經此一役，我承認我輸係我貪心，但呢個教訓實在太大了，血的教訓，所以也話過唔在掂呢隻野了。如果當其時識投資物業的話，我可能而家過億身家了。當然果時識的話就係，果時2x歲，識條鐵咩，所以算吧喇，不過呢個往事，我也深印在心上。
Comments